Afghanistan-in Taliban nena inkahhai pawtsei

Afghanistan sorkar chuan Eid festival puala Taliban nena inkahhai an puan chu a pawtsei.

President Ashraf Ghani chuan sorkarin inkahhai a puan chu zawm turin firfiakte chu a ngen a, inremna kawng zawnga inbiakna nei turin a sawm bawk. Hmun tam takah inkahhai puan hian zawm a hlawh ṭhain, firfiak pawl leh security force member-te pawh hlim taka an awmho hmuh a ni. Mahse Nangarhar-a thihchilh bomb puakah mi 25 an thi a, mi dang 50 in hliam an tuar. Islamic State (IS) firfiak pawl chuan he pawikhawihna hi an thlen niin an sawi.

TV-a thu a sawiah President Ghani chuan sorkar chu Taliban nena inbiakna nei turin a inpeih tih a sawi a, remna leh muanna a awm theihna turin Taliban-te thil phut hrang hrangte pawh ngaihtuah an inpeih tih a sawi a ni.

Inkahhai puan chhung, Eid festival hman chhung hian Taliban firfiakte chuan damdawi leh chhawmdawlna dangte an dawng thei dawn a, hei bakah jail-a tang mekte pawhin an chhungte an hmu thei dawn niin President chuan a sawi. Sorkar chuan festival pual hian Taliban mi ṭhenkhat chu jail aṭangin a chhuah tir bawk a ni.

United Nations Secretary General Antonio Guterres chuan Afghanistan sorkarin Taliban te laka inkahhai a puang chu lawmawm a tih thu a sawi. Taliban te chu he inremna hi ṭha taka zawm turin a ngen. UN hotu chuan Afghanistan tualchhung buaina chu inbiakna ṭha tak hmanga chinfel theih a ni tih sawiin, sorkar leh Taliban aiawhte chu muanna siamna tura hmalakna tibahlah zawnga thil ti lo turin a ngen bawk.