Kim-an China President duhsakna thawn

North Korea ram hotu Kim Jong-un chuan China President Xi Jingping-a piancham pualin a duhsakna a thawn. Hei hi kum nga chhunga a piancham puala duhsakna a hlan vawi khatna a ni.

Xi Jinping hi kar kalta Zirtawpni kha a piancham vawi 65-na a ni a, hemi pual hian Kim han lehkha leh pangpar a thawn a ni.

Ram pahnihte hi inṭhian ṭha tak ni ṭhin mah se, kum 2013-a Kim-an a pu, China nena inzawmna ṭha tak nei Jang Song-thaek a tihhlum tir hnu khan an inkar boruak a ṭha lo chho hle a ni. Hei bakah hian NKorea-in nuclear test a neih chhunzawm leh avangin an inkar hi a chhe zual a ni.

China hian US kaihhruaia North Korea hrekna a siam pawh a zawm zui ve leh a, hei hian ram pahnihte inlaichinna pawh a tihchhiat zual phah hle a ni. Mahse kumin kumtir lam aṭang khan an inkar boruak hian ṭhat lam panin, March leh April thla khan Kim leh Xi te hian meeting pawh a lo nei tawh bawk. March 25-28 kha puangzar lawk loin Kim hian China a tlawh a, President Xi nen pawh an inhmu a ni. Hei hi NKorea ram hotu atana kum 2011-a dah a nih hnua Kim-an ram pawn lam a tlawhna hmasa ber a ni. Hemi hnu, May thla tir lam khan hruaitu pahnihte hi China rama Dalian khawpuiah an inhmu leh bawk.