Mexico ramri-ah naupang tam tak tangkhang
US sorkarin Mexico aṭanga US-a pem luh tumte laka dan khauh zawk a hman avangin US-a luh tum mi tam tak ramri-ah an tangkang a, an zingah hian naupang 2,000 chuang chu an nu leh pate tel loin an awm niin official-ten an sawi.
US President Donald Trump-a kaihhruai sorkar chuan Mexico aṭanga pem luh tumte lakah dan khauh zawk a lekkawh mek a, hei vang hian ramri hrulah hian pem luh tum nu leh pate hren an nih vangin naupangte hi an nu leh pate tel loin ramri bulah hian an tangkhang mek a ni.
Attorney General Jess Session chua dan loa pem luh tumte chu ngaihnathiam an ni dawn lo tih a sawi a, dan kalha lut, man chhuahte chu dan anga an chungthu ngaihtuah zel a ni ang, a ti. Session chuan dan kalha ramri kan, kum tling chinte chu thubuai siamsak an nih avangin an fate lak aṭangin hruai hran zel an ni tih a sawi.
Kumin April 19 leh May 31 inkarah khan dan kalha ramri kan, mi 1940 hren an nih hman thu US Dept of Homeland Security report chuan a tarlang. Heng an mi hrente fa, kum tling lote chu an nu leh pate chungthu ngaihtuah a nih lai hian US Department of Health and Human Services kutah dah a ni.