Italy sorkar chhui chian phût

Italy hmarchhak lam, Bergamo biala Covid-19 kai chhungte chuan  nimin khan an ram prime minister Giuseppe Conte kaihhruai sorkar chu, an rama he hri leng dona kawnga a inthlahdah thu tarlangin chhui chian an phut. 

Hemi chungchangah hian PM Conte chuan zawhna awm thei tur zawng zawng chu chhan a hreh loh thu a sawi a, he hri dona kawnga sorkar hmalakna leh chet vel dan chhui tur zawng zawng chu lawm taka a pawm thu leh, Italy mipuite chuan thudik an hriat hi an chanvo a nih thu a sawi.

Thawhlehni khan Bergamo prosecutor office-ah Noi Denun­ceremo (We Will Report) pawl chuan complaint an thehlut a, he pawlah hian Covid-19 hri kai chhungte an awm nual a ni. He pawl hian Italy-a hri darh hmasak berna hmun Lombardy biala Alzano leh Nembro hmunte chu hri darh tirh khan red zone-a puan vat a nih loh thu a tarlang a ni. 

Lombardy bialah hian eptu lam League party (right-wing) an sorkar mek a, ṭhenkhat chuan hri leng chungchangah  League party hi hma la ṭha tawk lohah an puh ve thung a ni.  Lombardy bial hi Europe rama Covid-19 hri darhna hmasa ber a ni a, he hri vanga Italy-a thihna thleng zinga a chanve vel chu he biala mi an ni. 

February 21 khan Lombardy-ah hian Covid-19 hri kai hmuh chhuah a ni a, February ni 23-ah Alzano leh Nembro hmunahte  hri kai an tam chho ṭan hle tih Lombardy health minister Giulio Gallera chuan a sawi. 

Lombardy official-te chuan hri kai hluarna hmun red zone-a puan chu sorkar laipui mawhphurhna a nih thu an tarlang a, mahse PM Conte chuan an duh chuan hemi biala thuneitute chuan red zone-a an puan theih thu a sawi thung.