China leh US-in journalist-te khuahkhirhna thlahdul remti
US leh China chuan journalist-te laka khuahkhirhna an insiam tawn sak chu thlahdul an remti.
He thutlukna hi US president Joe Biden leh China president Xi Jinping-ten virtual meeting an neih hnuah ram pahnihte hian he thutlukna hi an siam a ni.
China state media, China Daily chuan kum khat chuang an sawidun hnuah ram pahnihte hian he inremna hi an siam thei ta tih a sawi. He inremna siam hnuah hian sorkar pahnihte hian journalist-te visa, thla thum chin chauh dam tura an pek ṭhin chu kum khatah an pawtsei dawn a ni. Hei bakah journalist-te an zin leh haw lamah pawh zalen takin an tei thei tawh dawn bawk a ni.
US state department thupuangtu chuan khuahkhirhna thlahdul a ni chu hmasawnna pawimawh tak a ni tih a sawi rualin, hma lak ṭanna chauh a ni, a ti. US bakah foreign media-te dinhmun chawikan leh zalenna zau zawk pek an nih theihna turin an bei zel dawn tih a sawi.
US leh China inkar boruak ṭha lo avangin nikum February thla khan US chuan China state media organisation-te chu 'foreign missions' tiin a dah a, an lakah khuahkhirhna khauh tak a siam zui a ni. News agency pangate chu US-a property an lei dawn anih chuan thuneitute phalna lak hmasak phawt tur leh, an hnuaia thawkte hming pawh thehlut vek turin a ti a, hei hi China chuan nasa taka sawisel nghalin inrahbeh tumna tiin a puh. Hemi chhan let nan hian China chuan hemi kum vek March thlaah an rama US journalist 13-te chu a hnawtchhuak zui ve a, an zingah hian New York Times, Washington Post leh Wall Street Journal-a thawkte pawh an tel. Ram pahnihten inremna an siamah hian heng journalist hnawtchhuah takte hi China-ah an kir leh phalsak an ni em tih erawh sawilan tel a ni lo.
US President Biden leh China President Xi-te hian Thawhṭanni khan virtual meeting an nei a, meeting-ah hian climate, trade, Covid-19 leh arms control chungchangte an sawidun. Meeting hi darkar thum leh a chanve vel an nei a, mahse thutlukna siam leh sawizui tur thil lian tham tak erawh a awm lem lo nia sawi a ni. Mahse ralthuam khuahkhirh chungchanga inbiakna neih dan tur erawh ngaihtuah zui an remti niin US national security adviser Jake Sullivan chuan a sawi.
President Biden lakluh a nih hnuah ram hruaitu pahnihte hi telephone-in ṭum hnih an inbe tawh a, meeting neih tur pawh hi China rama hri a len thar leh avangin President Xi hi a zinchhuak duh lo a, hei vang hian virtual-in an nei ta zawk a ni.