Pakistan leh Afghanistan inkarah Dosti bus tlan tir leh remti

Pakistan leh Afghanistan chuan ram pahnih inkarah Dosti bus service chhunzawm tir leh an remti.

Pakistan khawpui, Islamabad-a Afghanistan dinhmun sawihona Troika plus meeting-a tel, Afghanistan interim foreign minister Ameer Khan Muttaqi awm laiin ram pahnihte hian Dosti bus service chhunzawm leh hi an rel nghal a ni.

Inremna an siamah chuan Dosti bus hi Pakistan-a Peshawara aṭanga Jalalabad, Afghanistan inkarah tlan tir ṭhin a ni ang. Bus hi service chhunzawm leh a nih chuan Afghan refugee, sumdawng leh ramri hrula cheng tualchhung mite tan a ṭangkai dawn hle.

Muttaqi chuan Pakistan-a Balochistan province aṭang pawhin bus dang service tir theih thuai a nih a beisei thu a sawi bawk. Hemi atan hian inbiakna nei mekin, an sawifel thawhkhat tawh niin a sawi. Mahse ram pahnihte hian security chungchangte uluk takin an zirchiang leh phawt dawn tih a sawi bawk.

Pakistan leh Afghanistan hian ramri kaltlanga bus an tlantir, Dosti bus service hi kum 2016-a ramri chhehvela firfiakte an chet hluar chhoh aṭang khan an titawp a ni.