Israel-in missile hmangin Damascus-a in a kap

Syria state media chuan nimin zing khan Israel-in missile hmangin an ram khawpui, Damascus chhim lama in pakhat a kap tih an sawi.

State news agency, SANA chuan missile hi Israel-in an ram a luahsak, Golan Heights aṭangin kahchhuah a ni tih a sawi a, missile pakhat chuan Damascus chhim lama in pakhat a kap fuh a, missile pakhat erawh chu Syria defence system hmangin an lo kap thla tih a tarlang. In an kah fuh hi a ruak a nih avangin thil pawi lian tham erawh a thleng lo tih a sawi bawk.

Israel chuan hemi chungchang hi engmah a la sawi ve lo thung. Tun thla tir lam khan Homs khawchhak leh Tartous tuipui kam chu Israel sipaiten thlawhtheihna hmangin an lo kap tawh bawk a, hemi ṭum hian Syria sipai pahnih an thi a ni. October thla khan Israel-in Homs-a Palmyra bul a beihnaah Syria sipai pakhat thiin, midang pathumin hliam an tuar bawk.

Israel hian Syria ram chhung a beih chungchang hi a sawi zui ngai vak lo a, mahse Iran thurualpui, firfiak pawla a puan Hezbollah group-te hmunhma a beih thu erawh a sawi ṭhin. Hezbollah-te tana ralthuam tur phurtu convoy-te pawh a lo bei fo tawh a ni.