Khawvela khawpui boruak bawlhhlawh ber Lahore

Pakistan-a Lahore khawpui chu khawvela khawpui boruak bawhlhlawhna berah air quality monitor chuan a puang. Official-te chu khawpui boruak bawhhlawh lutuk tihziaawm dan tur ngaihtuah a, hma la thuai turin a ngen nghal bawk.

Nilaini khan Lahore khawpui air quality hi 348 niin, mihring tana hlauhawm chin nia sawi 300 chu a pel thui hle tih AirVisual monitoring platform enkawltu, Swiss technology company IQAir chuan a sawi.

Tun hnaiah Pakistan ram boruak hi a bawlhhlawh chak hle a, a bawlhhlawh chak chhan zingah hian diesel quality ṭha tawk lo hman nasat vang te, thlai ro hal nasat vangte a tel. India ramri bulhnaia awm, Punjab province-a Lahore khawpuiah hian mi maktaduai 11 chuang chengin, khawvela khawpui boruak bawlhhlawh zingah pawh a lo tel fo tawh a ni.

Punjab finance minister Hashim Jawan Bakht chuan thla thar aṭang chuan Lahore khawpui chhungah hian Euro-5 petroleum product chauh hman phal a ni dawn tih a sawi, Lahore division commisioner hnenah khawpui chhungah fuel high-quality chauh pek chhuah a nihna tura hma la turin a ti bawk. Tualchhung thuneitute chuan awmze nei loa bawlhhlawh leh thlai ro haltute chungchangah action an la zel dawn tih sawiin, Minister chuan provincial environment department hnenah province khawpuia air quality endikna tur hmanruate pek an ni dawn a ni, a ti. Health department lam pawhin khawpuia chengte chu pawn an chhuahin facemask hmang a, tarmit bun turin an chah bawk.