Australia mi 10,000 chuangin Vaccine side effect vangin zángnadawmna phut

Australia sorkar chuan Covid-19 vaccination program kaltlanga vaccine an pekchhuan te'n an taksa lamah harsatna an neih avangin USD maktaduai 37 chuang a chawi a ngai maithei.

Sydney Morning Herald chuan Australia sorkarin programme a siam hmanga Covid vaccine la zinga mi 10,000 te chuan vaccine an lak zawhah taksa lamah harsatna an neih avangin damdawi-in panpui an ngaih phah tih sawiin, sorkar chu zángnadawmna pe turin an phut tih a sawi. Zángnadawmna hi Australian dollar 5,000 aṭanga pek chhuah tur niin, heng mite thil phut hi pawmpui vek a nih chuan sorkar hian A$ mtd 50 vel a chawi a ngai dawn a ni.

Australia-a Therapeutic Goods Administration (TGA) chuan vaccine dose mtd 36.8 an pek tawh aṭangin mi 79,000 te chuan an insawiselna an tawh thu report an dawng tih a sawi. Side effect report tam zawk hi, ban kham, lu na, khawsik leh tlun te an ni.

TGA hian Pfizer Inc. vaccine lak vanga lung lama harsatna tawka insawi report 288 an dawng a, AstraZeneca Plc vaccine an lak avanga clotting disorder thrombosis leh thrombocytopenia syndrome (TTS) nei in report 160 an dawng bawk tih a sawi. Vaccine la zingah hian mi pakua an thi tawh a, thihpui zinga a tam zawkte hi kum 65 chunglam an nih thu TGA chuan a tarlang.

Sydney leh Melbourne-ah hri inkaichhawn awl tak Delta variant a darh avanga thla khat chuang inkharkhip an kalpui hnuah Australia hian kumin chawhnu lam khan vaccine semchhuah hna chak takin an kalpui a ni. Vaccine la an tam tawh avangin khuakhirhnate pawh zawi zawiin thlahdul hret hret zel a ni.