Kim Jong Un-a'n model city tlawh ; Thla khat chuang hnuah mipui hmuhah inlan

North Korea hruaitu Kim Jong Un chuan China nena inrina bula khawpui an sak thar chu tlawhin, thla khat chuang hnua mipui hmaa a inlannaah hian khawvel dangten an hrek leh enhrang chunga an hmalakna hian an ram tumruh zia a entir tih a sawi.

Korean Central News Agency chuan Thawhlehni khan Kim Jong Un-a'n Samjiyon khawpui, “sacred place of the sun” tia a sawi a tlawhnaah hian hnathawh danah a lung pawh a awi hmel tih sawiin, khawpui sak mek a thawh thumna leh hnuhnung ber tur chu a endik niin a tarlang.

"Kum li chhung an sak tawh Samjiyon khawpui hian rilru hmunkhat pua Party chhunga inremna ṭha tak awmte leh mipui-te tumruhna te, keimahni ngeiin kan hnathawh hmanga hlawhtlinna nei tura kan beihna leh midang rinchhan loa inringtawk tak chunga hma kan sawn theihna te a tilang a ni. General Secretary hian Party Central Committee aiawhin Party thutlukna siam leh policy-te tihhlawhtlin a nih theihna tura hnathawktu, thlawptu leh ram mipuite chu lawmthu a hrilh a ni," tiin KNCN chuan a sawi.

Kim Jong-un chuan Samjiyon khawpui dinna kawnga hlawhtlinna leh tawnhriat an neihte chu tualchhunga hmasawnna hnathawhna kawng dika kalpui tur party policy nawr kal tura kaihhruaihna dik tak a nih thu pawh sawiin, he an hmalakna hian local area-a danglamna thlenna tura bul thar an ṭanna turah awmzia nasa taka a neih tur thu a sawi bawk.

Samjiyon khawpui hi economic hmunpuiah thlak ani tawh a, official te chuan "socialist utopia” tia sawiin he khawpuiah hian apartment, hotel, ski resort bakah commercial, cultural leh medical facility-te dah a ni ang.

Samjiyon khawpui hi Kim Jong-un te chhungkua chhawr chhuahna nia sawi, Mount Paektu bula awm niin, Kim hian kum 2018 hnu lam khan ṭum engemaw zat a lo tlawh tawh a ni.

KCNA tarlan danin, Samjiyon khawpui sak mek hi kumin chhunga sak zawh hman tum a ni a, December 2011-a Kim Jong-il-a thih hnua a fapa Kim Jong-un-a'n thuneihna a chan kum 10 champhaah hawn theih beisei a ni.

KCNA hian Kim-a'n khawpui sak mek a tlawh thu hi Thawhlehni khan tichhuak mah se, a tlawh ni tak erawh a sawilang lo. Hei hi ni 35 hnua mipui hmuha Kim a inlan lehna hmasa ber niin, kum 2014 hnua mipui hmuhah a inlan loh rei ber ṭum a ni. Tun hnaia mipuia hmaa a inlan hnuhnung ber chu October 11-a arms exhibition-ah khan a ni.