Frida Kahlo lemziak USD mtd 35 zetin hralh

Mexican artist, Frida Kahlo-i'n ama lem a ziah chu New York auction house-ah Thawhlehni khan USD maktaduai 35 zeta hralh niin, a lemziah zinga hralh to ber record a siam.

He hmun aṭang vek hian French artist Pierre Soulages lemziak chu USD mtd 20.2 a hralhin, record thar a siam bawk.

Kahlo hian ama lem a ziah, "Diego y yo" ("Diego and me," 1949) tihah hian lemziaktu lem chal (forehead)-a a pasal Diego Rivera hmel a lo lang a ni. Kum 2016-a a lem ziah hralh to ber record a lo siam tawh, USD mtd 8-a hralh chu ama lem a ziahna hian a rawn khum a ni.

Latin American lemziah zingah "Diego y yo" hi lilamnaa hralh to ber niin, record hmasa kum 2018-a USD mtd 9.76 a hralh "Los Rivales" (1930) Diego Rivera ziah a ni.

"Diego y yo" hi Kahlo liamziak zinga ngaihhlut ber a ni a, a lemziak urhsun leh hriatthiam har tak vangin khawvel huap pawhin hriat a hlawh phah hle. He lemziakah hian Rivera hmai hi Frida chalah a lang a, a mitmu dum tak aṭanga mittui far lai a lang bawk. He lem a ziah lai hian Rivera hi Mexican actress Maria Felix nen an inhnimhnai hle nia sawi a ni a, Kahlo hian lemziahah hian a pasal avanga rilru chhungril hrehawmnate a rawn tarlang niin art expert-te chuan an sawi.

Kahlo leh Rivera hi vawi hnih an innei a. Kum 1954 khan kum 47 mi chauh niin a thi a ni.

Kum 1990 khan "Diego y yo" hi Sotheby-ah USD mtd 1.4 in hralh a lo ni tawh.