Russia-in Covid-19 kai enkawlna tur damdawi pawm

Russia health ministry chuan Covid-19 kaite enkawlna tur damdawi siam chu an ram damdawi-in hrang hranga hman turin a pawm tih Russian Direct Investment Fund (RDIF) chuan a tarlang. 

Covid-19 hri kaite enkawlna tur damdawi siam chhuah hi clinic hrang hrangah enchhinna neih hmasak phawt a ni a, he damdawi hming hi Avifavir (Favipiravir) tih a ni. He damdawi siam chhuaktu ber chu ChemRar Group (pharmaceutical development company) a ni a, damdawi an siam chhuah theih nan hian RDIF, Russia sovereign wealth fund chuan pawisa an thawh a ni. 

June thla chhung hian Russia-a damdawi-in hrang hrangah he damdawi 60,000 vel chu hman theih tura sem chhuah tum a ni. Covid-19 hri kai enkawlna tur damdawi hmuhchhuah a la ni lo a, Russia-in he hri kaite enkawlna tur damdawi a siam hi chu a hri enkawl damna damdawi niloin nat chhawkna ang chauh a la ni.

US leh Brazil tih loah chuan Russia hi Covid-19 hri kai tam berna a ni mek a, nimin tleng kha chuan he ramah hian Covid-19 hri kai mi 5,11,423 an awm a, heng zinga mi 2,69,370 chu enkawl dam tawh niin, he hri vanga thi hi mi 6,715 an awm tawh bawk.