Taliban ten inkahhai pawhsei an duh

Afghanistan sorkarin Eid festival puala Taliban firfiakte laka inkahhai a puan chu pawhsei a nih tur thu sawi mah se, Taliban-te chuan inkahhai hi an pawtsei ve dawn lo tih an sawi.

Taliban thupuangtu Zabihullah Mujahid chuan President Ashraf Ghani-an Inrinni-a inkahhai puan pawhsei a nih thu a sawi chu an ngaihtuah hnuah, an pawl chuan pawhsei an duh lo tih a sawi. Pathianni aṭang khan an pawl chuan inkahhai puan hi an titawp a, "Kan fighter-te chuan ramdang miten an duh ang anga an thunun theihte lakah beihpui an thlak chhunzawm leh nghal dawn a ni", a ti.

June 9 khan Taliban-te chuan Eid festival pualin Afghanistan security force-te an beih ṭhin chu an titawp lailawk dawn tih an puang a, hei hi kum 17 dawn chhunga inkahhai an puan ṭum khatna a ni.

Afghanistan security force leh Taliban-ten inkahhai an puan lai hian Islamic State (IS) firfiakte chuan Inrinni khan Nangarhar province-ah thihchilh bomb an tipuak a, mi 30 vel thiin midang 60 chuangin hliam an tuar a ni. Pathianni khan Jalalabad-ah governor office bulah bomb tihpuah leh niin mi 18 an thi a, he pawikhawihna thleng hi eng pawl mahin an tih niin an la chhal lo.

Taliban thupuangtu chuan Eid festival puala inkahhai an puan chuan an pawl inlungrualna leh rintlak zia a tilang niin a sawi. Hemi rual hian inremna zawnga sorkar nena inbiakna neih a la nih loh thu a sawi bawk.