Myanmar zirlaite'n class an boycott
Myanmar sipai sorkar chuan November 1 aṭang khan ram chhunga zirna inte hawng leh tawh mah se zirlai leh zirtirtute an kal duh loh avangin school tam ber chu khar an la ni.
Covid-19 hri leng vangin July thla khan ram pumah school khar a ni a, mahse sipai sorkar chuan November 1 aṭang khan zirna in hi hawng ṭan leh turin a ti a ni. Mahse zirlai leh zirtirtute chuan tualchhung buaina thleng mekah school-te beih tel a nih fo avangin an kal ngam lo tih an sawi. Nu leh pa tam tak pawhin sipaiten school-te chu an thunun tlat avangin an fate an kaltir duh lo tih an sawi bawk. School boycott chu sipai rorelna an dodalna lantirna pakhat leh, civil sorkar a din leh theihna tura an beih vena pakhat niin an sawi.
Sipaiten February 1-a civil sorkar thuneihna an hnehchhuh lai hian hri leng vangin ram chhunga school tam zawk chu khar an ni. June 1 aṭangin school-te hi hawng turin a ti a, mahse zirlaite hi an kal duh loh bakah an zinga a tam zawk chu sipai sorkar dodalna lantira nawrh huaihawtnaah an tel a ni. Civil Disobedience Movement (CDM)-ah Myanmar rama zirtirtu nuai li vel zinga a zahve aia tam zawk an tel bawk.
Education system an hman mek chu siamṭhat an duh thu an sawi bawk a, kum 20 chhung chu zirna kalphung hi thlak danglam a awm mang lo niin an sawi. Education system siamṭhat duhtu pawl, Basic Education Union-a executive member Min Htet chuan, " Sipaite hian Civil Disobedience Movement tihtawpsak an tumna kawng khatah zirtirtute chu school kal turin a ti lui a ni," tiin zirtirtu tam tak chu an hna aṭangin an ban phah tih a sawi. Ṭhenkhat erawh chu school an kal a, mahse heng mite pawh hi tualchhung buaina thlengah an him thei bik lo tih a sawi a ni.
Save the Children in data a lakkhawmah, tualchhung buaina a chhuah hnuah security force-te hian school 100 chuang an bei tel tawh a ni. Mandalay-ah zirtirtu pahnih chu sipaite tana an thawh duh loh avangin kutthlak an nih hnuah man an ni a, November 12 khan Mandalay-ah vek computer training school chu civil leader Aung San Suu Kyi nen zawmna neia puhin hal a ni bawk a ni.
November 1 aṭanga hawn tura tih hi primary, middle leh secondary school-te an ni a, December aṭangin university-te pawh hawn an ni dawn nia sawi a ni bawk. Mahse university zirlai tam zawk chuan boycott an tum tih an sawi.