Malcolm X thattua puh zinga 2 thiam chan tir dawn

Kum 1965-a Black activist leh civil rights advocate Malcolm X thattua puh zinga mi pahnihte chu thiam chantir an ni dawn tih Manhattan district attorney office chuan a sawi.

Malcolm X hi mihangten an dikna chanvo an neih theihna atana beitu, African-American Muslim pawl, Nation of Islam thupuangtu a ni ṭhin. Mahse kum 10 dawn a awm hnuah kum 1964 khan he pawl aṭang hian chhuakin, hnam hrang hrangte inpumkhatna chungchangah a aupui leh thung a ni. Hei vang hian Nation of Islam member ṭhenkhatte a chungah an lungawi lo a, phatsantuah an ngai hial a ni.

Kum 1965, February 21 khan New York khawpuia Audubon Ballroom-ah mipui hmaa thu a sawi laiin kahhlum a ni. He tualthahna thlengah hian Nation of Islam member pathum - Muhammad Aziz, Khalil Ilsam leh Mujahid Abdul Halim-te chu man niin, kum 1966 khan an pathum hian court chuan thiam loh chantirin damchhunga tang turin an chungthu a rel a ni. An zinga pakhat Khalil Islam hi a thi tawh a ni. Aziz hi kum 83 mi ni tawhin kum 1985 khan chhuah a ni a, Islam hi kum 1987 khan chhuah a ni a, kum 2009 khan kum 74 mi niin a thi.

Thiam loh chantir an nih chungchangah hian court chu thutlukna dik lo siama puhin pawisawilote thiam loh an chantir niin an puh. Nikum khan Manhattan District Attorney Cyrus Vance Jr.chuan nikum khan thubuai hi ngaihtuah ṭhat a nih tur thu a lo sawi tawh a ni. An chhui nawn leh hnuah tualthattua puh zinga pahnihte hi thiam chantir an ni dawn ta a ni. Thubuai ngaihtuah lai hian Aziz leh Islam-te hian an puhnate hi a dik lo thu an sawi reng. Hetihlai hian Halim-a thiam loh chantir a nihna erawh chu thlak danglam a ni ve lo thung.