Afghanistan-ah IS firfiak inzarpharh zau tawh

Afghanistan-a United Nations (UN) palai chuan Taliban-ten thuneihna an chan hnuah Islamic State (IS) firfiakte pawh an hluar chho hle a, tunah hian Afghanistan-a province 34-ah an inzarpharh chhuak ṭep tawh niin a sawi.

U.N. Special Representative Deborah Lyons chuan UN Security Council-ah hemi chungchang hi hrilhin, ram dangten an ngaihven a ngai zual hle a ni, a ti. Hemi chungchang a sawi chhuah hma lawk hian Kabul-a Shitte Muslim-te chenna hmuna bomb pahnih tihpuaktu an nih thu Islamic State-Khorasan Province's (ISKP) chuan an sawi.

Lyons chuan ISKP rawn lian chho zel chu Taliban pawhin an dang thei lo tih sawiin, province tin deuhthawah an che tawh a, kum 2020-a pawikhawihna ṭum 60 an thlen laiin kumin bikah ringawt pawh ṭum 334 pawikhawihna an thlen hman tawh a ni, a ti.

UN palai chuan Afghanistan ram economy tlachhe mek avangin mipuiten harsatna an tawk nasa hle tih sawiin, healthcare worker, zirtirtu leh chhamdawl hna thawktute hlawh pek an nih theihna tura ṭanpui turin ram dangte a ngen a, hei bakah chhawmdawlna pekte chu an la indaih lo hle tih a sawi bawk. Economy tlahniam zel hian ruihhlo leh ralthuam tawlhruk, mihringa sumdawnna leh dik lo taka pawisa hmuh theihna a tihhluar phah dawn a, hei hian firfiaka chetna pawh a thlen tir tam phah thei dawn a ni , a ti. Hetiang hi a thleng a nih chuan Afghanistan chauh ni lo, a chhehvel ram thlengin a nghawng zel dawn a ni, tiin Lyons chuan a sawi.