Spain-in kum 60 chunglam tan Covid-19 booster pechhuak
Spain chuan kum 60 chin chunglam tan Covid-19 vaccine dose thum, boooster an pechhuak ṭan.
Spain-ah hian hri kai an pun chak chhoh leh avangin booster dose kum 70 chin chunglam tana an pekchhuah ṭhin chu kum 60 chinah an tihniam tih prime minister Pedro Sanchez chuan Nilaini khan a sawi.
Covid vaccine hi ram mipui zinga 79% hnenah dose kimin an pe tawh a, thla hmasa aṭangin booster dose an pechhuak ṭan a, heng zingah hian cancer enkawllai, nursing home-a hnathawkte leh natna benvawn neite an pechhuak hmasa a ni.
"Vaccine panel meeting chu zawh fel a ni a, dose thumna hi health leh social-health professional bakah kum 60 chin chunglam tana pekchhuah kan remti a ni," tiin Sanchez chuan a sawi.
Ni 14 chhunga ramchhunga hri kai zat chu October thla tawp lam aṭang khan a sang chho leh a ni. Thawhlehni khan hri kai hi mipui nuai khat zelah 89 a nih laiin a tuk, Nilaini khan mipui nuai khat zela 96-ah a sang chho hman a ni. Austria chuan mi nuai khat zelah hri kai 1,400 an awm a, Netherlands mipui nuai khat zela mi 900 in hri kai anga chhinchhiah niin, heng ram te nena khaikhin chuan Spain-a hri kai dinhmun erawh a la ziaawm hle.
Spain-ah hian Nilaini khan hri kai thar 6,667 an awm belh leh a, hripui len tirh aṭangin hri kai 5,067,712 hmuh chhuah tawh niin, Covid-19 vanga thi 30 awm belh nen thihpui hi 87,775 an awm tawh a ni.
Brazil-in puitling zawng zawng booster pe dawn
Brazilian health minister Marcelo Queiroga chuan an ram mi, kum 18 chin chung lamte chu Covid-19 vaccine booster an pe dawn tih a sawi.
Marcelo Queiroga chuan scientific zirchianna an neih hnuah kum 18 chin chunglamte chu booster pe turin thutlukna an siam ta tih a sawi. Thuchhuah an siam hmasakah chuan kum 60 chin chunglam bakah immune system chak lo leh healthcare worker-te chiahin booster hi an la thei dawn tih an lo tarlang tawh a, mahse an thutlukna siam hi an thlak leh ta a ni.
Health Ministry data aṭanga a lan dan chuan booster la thei hi mi maktaduai 12.4 lai an awm.