Iraq-in IS firfiak panga an that

Iraq sipaite chuan nimin khan thuchhuah siamin thlawhtheihna hmanga beihpui an thlaknaah Islamic State (IS) group firfiak panga an that tih an tarlang.

Iraqi sipaite chuan helicopter hmangin Diyala province-ah beihpui an thlak tih an sawi a, Diyala hmar lama Udheim khua, Abu Sayda leh al-Abbara area-ahte IS an awm tih thu an dawn avangin Iraq army, police, leh paramilitary Hashd Shaabi forces-te chuan inthurualin Nilaini zing aṭang khan beihpui an thlak tawh a ni.

Kum 2017-a IS hneha puan an nih hnu khan Iraq-ah hian IS-te hian pawikhawihna an nei tam ta vak loa, chuti chung chung chuan a khat tawkin security force leh tualchhung mi an bei reng tho a ni.