SKorea leh US-in military drill titawp

South Korea leh US sipaiten South Korea-a joint military drill an neih chu tihtawp a ni ta tih nimin khan official-ten an sawi.

June 12-a Singapore-a US President Donald Trump leh NKorea ram hotu Kim Jong-un ten meeting an neih khan President Trump chuan Korean Peninsula-a muanna a awm theihna tura hmalakna kawng khat atan SKorea leh US sipai ten joint military drill an neih ṭhin pawh tihtawp a nih tur thu a sawi a ni. NKorea chuan US-SKorea military drill neih ṭhin hi a ngaimawh thei hle a, an ram beihna tura inbuatsaihna angah a

ngai a ni.

South Korea defence ministry chuan thuchhuah siamin, ram pahnih sipai ten joint drill an neih ṭhin chu tihtawp rih a nih thu a sawi a, hei hian August thlaa Ulchi Freedom Guardian drill neih tum pawh a nghawng tel dawn nia sawi a ni. He hunah hian US sipai 17,500 zet tel tura lo ruahman tawh a ni.

South Korea-a hian US sipai 29,000 vel an awm mek a, kumtin ram pahnihte hian military drill lian tham tak an buatsaih ziah ṭhin.

Pentagon thupuangtu Dana White pawhin joint military drill tihtawp rih a nih thu hi a nemnghet tawh bawk a, mahse hma lak zel dan tur chu an la ngaihtuah dawn tih a sawi. Tunkar tawp lam hian hemi chungchang ngaihtuah hian US Defence Secretary Jim Mattis, Secretary of State Mike Pompeo leh National Security Advisor John Bolton te an inhmu dawn a ni.