Covid-19 kai an pun belh zel

Kar li chhung chu a zawnin khawvel huapah Covid-19 kai thar an pun belh leh a, hri kai hmuhchhuah tamna te hi Europe mai bakah America leh Western Pacific ramte a nih thu World Health Organization (WHO) chuan report a tihchhuah tharah a tarlang.

Hri kai hi kar hmasa nena khaikhinin 6% in a sang zawk a, khawvel huapah Covid-19 thihpui chu ram tam zawkah tlakhniam lam pan mah se Europe bikah erawh an pung thung a ni.

Khawvel puma hri kai hmuhchhuah tamna ram panga tarlan zinga ram palite chu Europe : Russia, Germany, United Kingdom leh Turkey te an ni. United States chu kar khat chhunga hri kai hmuhchhuah tamna ber a la ni thung.

Europe ram zahve dawnah kar liamta chhung khan Covid-19 kai 10% emaw a aia tamin emaw a pung chho leh a,Europe khawchhak lama vaccine la tlemna ram zingah hri kai dam lo an pung chak hle bawk.

Western Pacific region, Fiji, Vietnam, leh New Zealand-ah te chuan hri kai an tlahniam tawh thung. America-ah chuan United States leh Brazil-ah an pung leh a ni.