Netherlands : Khuahkhirhna duh lohna lantirnaah buaina chhuak

Netherlands sorkarin Covid-19 hri leng vanga khuahkhirhna a siam thar leh duh loa kar liamta Inrinni zana The Hague-a lungawi lohna lantirnaah buaina chhuakin, pungkhawmte chuan police-te chu lung leh puak thei thil hmangin an tawng. Mipui pungkhawmte hnawhdarh nan water cannon-te an hmang bawk.

Covid khuahkhirhna duh lohna Urk khua leh chhim lama khawpui dangahte pawh lantir a ni a, hri leng vanga kharkhipna hnuaia football match hnih khelh pawh mipuite hian an tibuai zui bawk a ni.

Zirtawpni liam ta khan Rotterdam-ah nawrh huaihawtah buaina nasa tak a lo chhuak tawh bawk a, pungkhawmte hnawhdarh nan police-ten silai an hmetpuak a, mi pathum hliamin pungkhawm zinga tel mi 51 chu man an ni. Justice minister Ferd Grapperhaus chuan buaina thlentute a dem thu sawiin, "Rottermdan-a buaina chawk chhuak a, police officer, riot police leh firefighter-te beihletute chu an ngeiawm takzet a ni," tiin lungawi lohna lantir turin mipuite chuan dikna an nei a, mahse Rotterdam-a thil thlen dan erawh pawikhawihna lian tak a ni, a ti. Hetih lai hian police-te silai hmehpuah chungchang hi chhui chian a ni bawk ang.

Netherlands-ah hian hri kai an pun avangin kar liam ta aṭang khan kar thum chhung atan khuahkhirhna siam leh a ni a, mahse heti chung hian nitina hri kai thar zat chu an la pung zel a ni. Hei vang hian sorkar chuan khuahkhirhna khauh zawk siam a tum a, Covid vaccine la lote chu punkhawmna leh hmun ṭhenkhatah an kal khapsakna tur dan siam a tum. Hei hi duh loin mipuite hian lungawi lohna hi an lantir a, prime minister Mark Rutte-a'n vaccine la lote thliar hran a tumna chu an dodal tih an sawi.

The Hague police-te chuan nawrh huaihawtten an beihnaah police officer panga in hliam an tuar tih sawiin, damlo phurtu ambulance pawh pungkhawmte hian lungin an tawng bawk tih an sawi.