UN human rights council aṭangin US a bang
US chuan United Nations Human Rights Council chu thlei bik neia puhin, council aṭangin bang.
UN-a US ambassador Nikki Haley-i chuan UN human rights council chu pawn langa lan ṭhat tuma thil ti nia puhin, human rights chungchang nuihzatbura siamtu a ni, a ti. Kum 2006-a din, UN human rights council hi human rights palzut nasa ram nia sawite member-ah a telh avangin sawisel a lo hlawh fo tawh a ni.
Haley-i hian Secretary of State Mike Pompeo nena joint news conference an neihah council aṭanga US a ban thu hi a puang a ni. Mike Pompeo pawhin UN human rights council chu human rights vawnhim kawnga hna thawk chhe tak niin a sawi.
Activist-te chuan council aṭanga US a ban hian khawvel ram hrang hranga human rights palzut chungchang enfiah leh a siamṭhatna kawnga hmalakna thlengin a nghawng thei dawn niin an sawi.
UN Secretary-General Antonio Guteres chuan thuchhuah siamin, US chu council-a awm zui zel se a duh thu a sawi. UN council chu khawvel huapa mihring dikna chanvo humhalhna kawnga hmalatu pawimawh tak a ni, a ti. UN human rights commissioner Zeid Ra'ad Al Hussein chuan council aṭanga US a bang chu pawi a tih thu a sawi a, hemi rual hian a thutlukna siam hi an rinlawk sa deuh a nih vangin thil mak tak chu a ni lo tih a sawi. Hetih lai hian Israel chuan US thutlukna siam hi a fak thung.
US leh UN human rights council inkar hi a hma pawhin alo buai tawh a, kum 2006-a din anih khan thleibik leh duhsak bik neia puhin President hlui George Bush-a kaihhruai sorkar khan council hi a lo boycott tawh a ni. Hetih hunalai UN ambassador, tuna President Trump-a security adviser ni ta John Bolton chuan na takin a sawisel a ni. Kum 2009-a Barack Obama a president hnuah khan US hian council hi a zawm ve leh chauh a ni.
UN human rights council-ah hian kum thum term atan ram 17 thlan an ni ṭhin a, kum khatah ṭum thum meeting neiin human rights record-te an ennawn ṭhin. Hei bakah hian human rights palzutna ram nia sawi, a bikin Syria, North Korea, Burundi, Myanmar leh South Sudan-ah te thil awmdan enfiah turin expert-te tirh an nih bakah, commission of inquiry-te din a ni bawk.