Israel-in indo thlawhtheihna hmangin Gaza bei

Israel sipaite chuan Thawhlehni zan khan indo thlawhtheihna hmangin Gaza Strip chhim lam, Rafah khuaah Islamic Hamas sipaite hmun an bei a, mi pahnihin hliam an tuar.

Hamas ho chuan Israel sipaiten an hmun pawimawh an beih hnu hian mortar shell hmangin Israel hi an kap zui ve nghal a ni.

Israel sipai thupuangtu chuan a hmain Gaza Strip aṭang hian Israel ram chhungah balloon leh lehkhachaih hala chhuah anih avangin fighter jet hmang hian chhan let an ni tih an sawi. Lehkhachaih leh balloon chhuah hi Palestinian miten March 30 aṭanga Gaza Strip-a nawrh an huaihawt, "The Great March of Return and Breaking the Israeli Siege" tih peng pakhat atan an hmang tel a ni. Lekhachaih leh balloon-te chu halin, Gaza ramri aṭangin an chhuah a, ṭhenkhatah chuan puak thei thilte an dah tel bawk. Hengte hi Israel rama thlai chinna leh ram ngawah tlain kangmei a chhuak zui a, thil a tichhe nasa thei hle a ni.

Gaza-a security official-te chuan Israel drone leh indo thlawhtheihna F16 hmangin Hamas armed wing ho hmun chu ṭum eng emaw zah kah a nih thu an sawi.

Gaza-a health ministry thupuangtu, Ashraf al-Qedra chuan March 30 aṭang khan Palestinian nawrh huaihawt leh Israel sipaite inbeihnaah hian mi 130 an thi tawh a, mi 14,000 in hliam an tuar bawk niin a sawi. Thi zinga a tam zawk hi Israel sipaite silai hmehpuaha thi an ni tih a sawi a, hliam tuar zinga tam tak chu an dinhmun a ṭha lo hle tih a sawi bawk.