Hungary-in pem lutte ṭanpui khapna dan siam

Hungary Parliament chuan an rama dan loa pemlutte ṭanpui khapna dan a pass.

He dan siam thar, "Stop Soros law" hmang hian dan loa pemlutte lo ṭanpuitu lawyer leh activist-te chu thubuai siamsakin, kum khat chhung lung-in tantir theih an ni ang.

Hungary sorkar chuan dan loa an rama pemlutte chuan an ram himna a tiderthawng thei niin an sawi a, hetih lai hian pemlutte ṭanpui khapna dan a siam hi ram hrang hrangten an sawisel nasa hle. UN refugee agency chuan Hungary official-te hnenah dan siam thar hi sut turin an ngen a, Council of Europe human rights organisation-a legal expert-te pawhin he dan hi ennawn a nih hma chuan hmang rih lo turin an ngen bawk.

Dan siam thar hnuaiah hian mi tupawh, pem lutte ṭanpui hna thawhnaa inhnamhnawih mimal leh pawlte chu jail-a tantir theih an ni dawn a, mahse human rights group lam chuan an mi ṭanpuite hi Hungary sorkarin dan ang taka luh a phalsakte an nih thu an sawi thung. Hungary-a inhumhimna dil theih chin tur pawh khuahkhirhna siam a ni bawk a, an ramah an nunna atana derthawng thil a thleng a nih loh chuan inhumna hi an dil thei dawn lo a ni.

Kum 2015 khan Hungary-a pem luh dil mi 177,000 an awm a, an zinga mi tlemte chauh phalna pek an ni. Nikum khan luh phalna pek hi mi 3,200 vel an awm bawk.