China-in nuclear university a din dawn

China chuan nuclear technology lam zirna bik univeristy a din dawn nia sawi a ni.

Media report chuan university thar hi Beijing bula Tianjin Municipality-ah din a ni dawn tih an sawi a, he university hi China rama nuclear power developer leh nuclear power plant operator lian ber, China National Nuclear Corporation (CNNC) in a din dawn a ni.

University-ah hian nuclear programme chungchangah zirtirna pek a nih bakah, core technology research te neih a ni bawk ang.

Chinese media-te chuan CNNC-in graduate 3,200 chuang a chhawr mek zingah 20.3% chauh chu nuclear kaihhnawih course zirchhuak niin an sawi. CNNC pawh hian nuclear lam thiamna nei an mamawh zat chanve pawh China rama college leh university ding mekte chuan kum 2016–2020 chhungin an chher chhuak thei dawn lo tih a lo sawi tawh bawk.

China hian nulcear power project eng emaw zat neiin, hma sawn zel a tum a, mahse power plant design, engineering construction, operation leh security control lama mi thiam an indaih lo hle. Heng lama thiamna nei lo, qualified lo chhawr chuan nuclear power security a tiderthawng thei niin State Council's Development Research Center-a researcher-te chuan an sawi.

Kum 2016 khan China-ah hian nuclear power plant hman lai 31 awmin, siam mek 23 a awm. China hian kum 2020-ah chuan gigawatts 58 pechhuak theih nuclear plant neih hman a tum a ni. Kum 2017 khan China-a electiricy pekchhuah zinga 3.7% chauh chu nuclear power plant aṭanga pek a la ni.