President Trump-an naupangte lak hran tihtawpna tur thupek tichhuak

US President Donald Trump chuan US ramri-a dan loa an rama lutte leh an fate dah hran an nih tihtawpna tur thupek a tichhuak.

Ramri kaltlanga dan loa US-a lutte venna khauh zawk hi May 5 aṭang khan kalpui niin, dan loa lut nu leh pa leh puitlingte chu man niin, an fate lak aṭangin lakhran an ni. Naupang 2,300 chuang zet chu an an nu leh pate man an nih avangin tent camp leh hmun dangahte dah an ni a, an chhungte an pepawp thei lo a ni.

He thil hi ram hrang hrangin an dem thu an sawi a, Democrats bakah President Trump-a party Republican mite ngei pawhin titawp turin an nawr a ni. US chu human rights palzutah puhin demna a nasat phah hle.

Nilaini khan President Trump chuan thupek hi tichhuakin, chhungkua ṭhendarh an ni chu amah ngei pawhin hmuh hrehawm a tih thu a sawi. Hemi rual hian ramri ven hna chu khauh takin kenkawh chhunzawm zel a nih tur thu a sawi bawk.