Israel PM nupui sorkar sum hmang dik loah puh

Israel Prime Minister Benjamin Netanyahu-a nupui, Sara Netanyahu chu sorkar sum dik lo taka hmanga puhin thubuai siamsak a ni.

Sara Netanyahu hi prime minister official residence-a catering service tihna turin sorkar sum shekel 359,000 (dollar 100,000) dik lo taka hmanga puh a ni. Mahse he puhna hi Sara-i chuan a pha a, a ukil-te pawhin thu dik lo leh phuahchawp mai niin an sawi.

Ningani khan Sara-i leh prime minister office-a deputy director general hlui Ezra Seidoff-te chu thubuai siamsak an ni.

Jerusalem District Attorney Office chuan Sara Netanyahu leh Seidoff-te puhna chungchanga finfiahna hrang hrangte an ennawn hnuah thubuai siamsak an nih thu a sawi.

Sara leh Seidoff te hi kum 2010 September leh 2013 March thla inkara prime minister official residence-a ei tur service tirna leh private chef rawihna atan sorkar sum an hmang nia puh a ni a, hetihlai hian PM chennaah hian ei siamtu hran rawih a ni. Catering service leh chef rawihna atan hian sorkar sum hi hman phal a ni lo a ni. Mahse Sara-i ukilte chuan he thil chungchang hi a hriat loh avangin Sara-i hian tihsual a nei lo niin an sawi a, ei tur order-tu chu an manager hlui zawk niin an sawi.