Korea War-in chhungkua a ṭhendarhte inhmuhkhawm dan sawi

North Korea leh South Korea ram aiawhte chu Korean War vanga chhungkaw ṭhendarhte inhmuhkhawm tir dan tur ngaihtuahin nimin khan an inbia. Hei hi kum thum hnua an inhmuhkhawm leh theihna hmasa ber tur a ni.

Korean War vanga inṭhendarhte inhmuhkhawmna hun buatsaih hi NKorea hotu Kim Jong-un leh South Korea President Moon Jae-in ten ram pahnihte inkar siamṭha tura hmalakna tura an tih zingah antelh a ni.

Nimina meeting hi NKorea ram chin, Mount Kumgang-a hotel-ah chawhnu dar 1 khan neih a ni. NKorea palaite hotu, Pak Yong II chuan ram pahnih aiawhte chuan inringtawn chunga inbiakna hlawhtling tak an neih a ṭul thu a sawi a, rawtna an neihte pawh an inngaihpawimawh sak tawn a ngai a ni, a ti. Pak chuan thil hluite chu an theihnghilh a, ram pahnih hruaituten inlaichinna ṭha siam tura kawng an lo sial tawhte chu ṭha taka zawm a ngai tih a sawi.

SKorea official-te chuan indona avanga chhungkaw ṭhendarh zing aa tam zawk chu kum 80 chho an ni tawh tih sawiin, an inhmuhkhawm hun buatsaih hnuhnung ber chu kum 2015 daih tawhah a ni, a ti. Reunion buatsaih bakah Ramri-in a ṭhendarh chhungkuate hi video conference leh lehkhathawn hmanga an inbiakpawh pawh chhunzawm tir leh an duh thu a sawi bawk.

Kum 2000 aṭang kha Korean War avanga chhungkaw inṭhendarh, North leh South-a awm mi 23,676 chu inhmuhtir leh, videolink hmanga inbiak tir an lo ni tawh a ni. Ram pahnih ten inhmuhkhawmna hun an buatsaiha tel dil, South Korea lam mi 131,531 zinga 56% zet chu an thi tawh a ni.