Pakistan inthlanah JuD-in candidate 265 nei dawn

Pakistan ram inthlanpui, July 25-a neih turah firfiakten Mumbai khawpui an beihnaa mawhphurtu bera puh, Hafiz Saeed-a pawl Jamaat-ud -Dawah (JuD) chuan candidate 265 a nei dawn.

JuD candidate zingah hian Saeed-a fapa leh a makpa te pawh an tel. Saeed erawh chuan inthlan hi chuh ve a tum lo.

Hafiz Saeed-a kaihhruai JuD hi UN resolution chuan dan pawnah a lo hnawl tawh a, Saeed pawh hi firfiaka chetna hrang hranga a inhnamhnawih avangin a lu manah US dollar maktaduai 10 phal a ni.

JuD hian inthlan chuh tur hian political front Milli Muslim League (MML) a din a, mahse Election Commission of Pakistan (ECP) chuan political party anga inziahluh a tumna chu a hnawlsak a ni. MML anga inthlan an chuh leh theih dawn tak loh vangin JuD chuan ECP-a inziaklut tawh, Allaha-u-Akbar Tehreek (AAT) party hminga inthlan hi chuh an tum ta a ni.

MML chuan MML member, AAT hminga inthlan chuh tumte nomination paper chu returning officer-ten enfiahin an pawmsak vek tawh niin a sawi. Candidate 265 neiin, heng zinga 80 hi National Assembly (NA) niin185 te chu provincial assembly inthlana chuh tum a ni.