Taliban-te'n TV drama-ah hmeichhia lan an khap
Afghanistan-a Taliban sorkar chuan thupek thar siamin, an ram chhunga television drama tihchhuahah hmeichhiate inlan a khap.
Hei bakah hian hmeichhe journalist leh presenter-te pawh TV-a an lan dawnin an lu tuamna, headscarve hmang vek turin a ti bawk a ni.
Taliban hian kumin August thla laihawl aṭang khan Afghanistan-ah sorkar thuneihna an hnehchhuh a, sorkar huam zau zawk siam intiam mah se thuneihna an chelh hnu lawkah hmeichhiate chu school kal chhunzawm rih lo a, in lama awm turin a ti a ni. Kum 1990 chhoa thuneihna an chan lai khan hmeichhiate lakah khuahkhirhna khauh tak siamin, lehkha zir a khapsak bakah hnathawka an chhuah an khap bawk a ni.
Thupek tihchhuah tharah hian television channel tana dan pariat siamin, Sharia/Islamic law kalh zawng leh Afghans sawisel zawnga film siam tihchhuah khap a ni a, mipa pawh an taksa lawng tilang tama tihlan a khap bawk. Comedy/entertain show pawh Islam sakhua leh Afghan ram sawiselna leh deusawhna lam hawi tihchhuah khap a ni bawk. Foreign film, hnam dang nunphung chawilar tumna pawh chhuah phal a ni lo bawk.
Afghan television channel-te hian ram pawn drama, hmeichhe lam channate an tichhuak nasa ṭhin a, mahse Taliban-ten thupek an tihchhuah thar tak avangin an tichhuak chhunzawm thei dawn ta lo a ni.
Hmeichhiate khuahkhirhna an siam leh chungchangah sawisel an tawk nasa hle a, mahse Taliban-te chuan hengte hi hun rei lote tana siam lailawk mai a nih thu leh, hnathawhna hmun leh pawn lam boruak chu hmeichhiate tan a him tawk em tih tihchian phawtna tur a ni tiin an sawi ve thung.