Myanmar tel loin China-ASEAN summit nei

China leh Association of Southeast Asian Nations (ASEAN) hruaitute chuan nimin aṭang khan Myanmar ram aiawh tel loin virtual summit an nei.

Summit neih turah hian China chuan Myanmar sipai hotu chu telh ve turin ngen mah se, ASEAN lam chuan an remti lo a ni. ASEAN summit neih takah khan Myanmar commander-in-chief general Min Aung Hlaing chu telh a lo ni tawh lo bawk.

Member ram 11 awmna, ASEAN hian April thla khan Myanmar-a sipai sorkar a din hnuah tualchhung buaina thlengte titawp a nih theih dan tur chu Gen Min Aung Hlaing hi sawipuiin, hma lakna tur inremna pawh an lo siampui a ni. Mahse sipai sorkar hian inremna an siamte hi a zawm loh avangin Myanmar laka an lungawi lohna lantirin summit-ah pawh an telh ve ta lo a ni.

Nimina China-ASEAN summit-ah hian Myanmar sipai hotu hi telh turin a ti a, mahse Indonesia, Malaysia, Singapore leh Brunei chuan an duh lo a ni.

Myanmar-a civil sorkar aiawh tura din, National Unity Government (NUG) chuan China-in Myanmar sipai hotu telh a rawt chu sawiselin, a ti dik lo a ni, a ti. Myanmar sipai sorkar chuan ASEAN an thlawp lo a, China leh ASEAN tan thil ṭha engmah an thlen lo a, tualchhung buaina chiah an thlen a ni tiin NUG thupuangtu Dr Sasa chuan a sawi a ni.