Haiti-a missionary rukbo 17 zinga pahnih chhuahtir

Haiti rama October thlaa Kristian missionary rukbo 17 zinga mi pahnih chu an chhuah zalen thu Christian Aid Ministries chuan a sawi.

Thuchhuah an siamah, Christian Aid Ministries chuan rukbo zinga pahnih chhuah an nih thu leh, chhuah an nihna chhan tak erawh an la hriat loh thu a sawi. "An chhuah avanga kan lawm rual hian an hren mek mi 15 te chu rilruah an awm reng a ni," a ti.

Rukbote hi America mi 16 leh Canada mi pakhat niin, an zingah hian naupang panga an tel. October thla khan hnuchham in an tlawh haw lam chu rukbo an ni a, an driver Haiti mi pawh an man tel a ni.

Missionary-te rubotu pawl, 400 Mawozo chuan an mi rukbote tlanchhuahna atan hian mi pakhatah US dollar makatduai khat zel a phut ni. An pawl hotu chuan an thil phut hi pek an nih loh chuan an mi rukbote hi thah vekah a lo vau tawh a ni.

Haiti rama misual rual pawl hrang hrang kaihhnawih thila pawikhawihna leh tharum thawhna a thleng fo a, US sorkar chuan venhimna lam ṭhat tawk loh vangin an mi leh sate chu Haiti ram chhuahsan turin a lo ngen tawh a ni.

Kar liamta Zirtawpni khan Canada pawhin Haiti rama an embassy-a palai pawimawh tih loh thawktu dangte chu an hruai haw vek dawn tih an puang bawk.