Turkey-ah inthlan buatsaih

Turkey President leh Parliament inthlan chu nimin khan neih a ni a, zing dar 8 aṭangin vote thlak ṭan a ni. Vote nei mi maktaduai 60 an awm.

President thlannaah hian candidate paruk an awm a, president tling tur chuan vote tla aṭanga 50% chin hmuh a ngai a ni. Hemi zat hmu pha an awm loh chuan July 8-ah inthlan thawh hnihna hi neih leh a ni ang. Candidate zingah hian President ṭanglai Recep Tayyip Erdogan pawh a tel a ni.

Parliament seat 600 atan inthlan hi neih a ni bawk a, political party pariatin an chuh. President Erdogan-a party AK Party (AKP) kaihhruai ṭangrual pawl chuan majority neih leh ngei tumin an bei leh dawn a ni.

Nimina inthlan buatsaih hian Turkey ram chu parliamentary system aṭangin presidential system-ah a thlak dawn a ni. Kum 2017 April 16 khan President thuneihna sang zawk pekna tura danpui siamṭhat rawtna an lo pawm tawh a ni. President Erdogan hi thlan tlin a nih chuan president system hnuaia Turkey ram hruaitu hmasa ber a ni dawn a ni.

President leh Parliament member turte hi mipuiten direct-in an thlang a ni.

Kum 2016 July thlaa Turkey sorkar paihthlak tuma beih a nih hnu khan state of emergency puan niin, tun thlengin hman ala ni.