Ethiopia PM huaihawt inkhawmah grenade a puak

Ethiopia Prime Minister Abiy Ahmed-an kar kalta Inrinni-a an ram khawpui, Addis Ababa-a vantlang inkhawm a buatsaihah grenade tihpuah a ni a, mi pakhat a thi a, midang eng emaw zatin hliam an tuar.

Thuneitute chuan pawi khawihna thlengah hian PM a him thu sawiin, a bodyguard-ten hmun him lamah an hruai nghal tih a sawi. PM chuan he pawikhawihna thleng hi an ram ṭhendarh tumtute thiltih niin a sawi.

Police-te chuan pawi khawihnaa inhnamhnawiha rinhlelh mi paruk man an nih thu an sawi. Hetihlai hian venhim hna thawk ṭha loa puhin police official pakua man an ni bawk a, an zingah hian Addi Ababa Police Commission-a deputy commissioner pawh a tel.

PM Abiy hian April thla khan president dinhmun hi a chelh ṭan a, kum 2015 aṭanga nawrh huaihawt hrang hrangin an ram dinhmun a tihchhiatte siamṭha a, sorkar inrelbawl dan pawh langtlanga kalpui a tiam a ni. Hun reilote chhungin Ethiopia sum dinhmun tih hmasawnna tur thil nasa tak a siksawi bakah, sorkar dodal vanga lung-ina khung te pawh a chhuah tir tawh a ni. Hetih lai hian Africa rama economy ṭhang chak ber zinga mi, Ethiopia ramah hian kum 20 chuang party ngaiin ro a rel tawh avangin an hamṭhatna neihte hi pawl leh bial-ah an sem dan a rualkhai lo hle nia sawi a ni thung.