Saudi Arabia-a hmeichhe motor khalh khapna hlip ta

Saudi Arabia rama hmeichhe motor khalh khapna dan siam chu Pathianni khan official-a hlih a ni ta.

Saudi Arabia sorkar chuan nikum September thla khan an hmeichhiate motor khalh phalsak an nih tur thu a lo sawi tawh a, tun thla tir khan a vawikhatna atan hmeichhe ṭhenkhat hnenah driving licence pekchhuah a ni bawk. Nimin khan official-in hmeichhe motor khalh khapna tihtawp a ni ta a ni.

Khawvel ram hrang hrang zingah hian Saudi Arabia chauh hi hmeichhe motor khalh khapna awmchhun a ni a, he dan hi hlih phutin women's rights activist-te chuan an lo bei fo tawh a ni. Sorkarin he khapna dan hi hlip mah se, hmeichhiate motor an khalh phalsak tura beitu, activist pariat vel chu a la tang a, heng mite hi firfiak thubuai siamsakin thiam loh chantir an nih chuan hun rei tak tantir an ni thei dawn niin human rights group Amnesty chuan a sawi. Women's rights activist tang mekte hi chhuah turin Saudi sorkar chu a phut nghal bawk.