Turkey inthlanah President Erdogan leh a thawhpuite chak

Pathiannia Turkey president leh parliament thlanna neihah President Recep Tayyip Erdogan leh rorellai, Justice and Development Party (AKP) leh a thawhpuite chuan hnehna an chang.

President thlannaah Erdogan hian vote tla aṭangin 52.5% a hmu a, amah hnaih bertu eptu pawl Republican People's Party (CHP) candidate Muharrem Ince chuan vote 30% a hmu. Jail-a tang chunga president inthlana chuhtu Kurdish People's Democratic Party (HDP) chuan vote 8.3% hmuin, hmeichhe candidate awmchhun Meral Aksener chuan 7.4% a hmu a ni.

Parliament inthlanah AKP hian vote 42.4% hmuin, a thawhpui Nationalist Movement Party (MHP) chuan 11.2% a hmu bawk. CHP chuan 22.7% a hmu a, HDP in 11.5% a hmu a ni.

Pathiannia inthlanah hian vote nei zinga 87% velin vote an thlak a ni.

AKP hian vote hmu sang ber mah se, member 600 awmna parliament-a hian majority a nei pha dawn lo a, a thawhpui MHP nen majority hi a nei pha thei dawn chauh a ni.

Turkey ram danpui thar hnuaiah parliamentary system aṭangin presidential system-a thlak a ni dawn a, President Erdogan chuan thuneihna sang zawk a nei tawh dawn a, prime minister dinhmun tihbo a ni ang. Danpui siam thar hnuaiah hian president chuan public official, minister leh vice president-te direct-a ruat turin thuneihna a nei dawn a, legal system-ah pawh a inrawlh thei ang. State of emergency puang turin thuneihna pek a ni dawn bawk. Sawiseltu lam chuan mi pakhat kuta thuneihna sang tak pek chu an ram tan a ṭha lo zawk dawn nia an ngaih thu an sawi.

Erdogan hi kum 11 chhung prime minister a nih hnuah, kum 2014 khan president a ni. Ram danpui siam thar hnuaiah hian a president term hnihna kum 2023-a a tawp hunah pawh inthlan hi a ṭum thumna atan a chuh leh thei dawn a, kum 2028 thleng thuneihna a chelh thei dawn a ni.