US Secretary of Defence-in China a tlawh dawn

US Secretary of Defence James Mattis chuan vawiin hian ni li cham turin China, South Korea leh Japan te a tlawh dawn. China hi a tlawh ṭum khatna tur a ni.

James Mattis chuan June thlaa President Donald Trump leh NKorea hotu Kim Jong-un ten Singapore-a meeting hlawhtling tak an neih hnuah, NKorea ram ṭhianṭha China-in nuclear ralthuam tichhe tura NKorea nawr a intiam thu a sawi chu a taka nemngheh theih a beisei thu a sawi.

Mattis hian China a tlawh hmasa ber dawn a, vawiin aṭanga Ningani thleng chamin China defence official-te a kawm ang. China aṭng hian SKorea a pan ang a, Zirtawpni-ah Japan a pan leh dawn a ni. Mattis chuan US, China, Japan leh SKorea chuan duh thuhmun an nei a, chu chu Korean Peninsula-a nuclear ralthuam tihbo a, boruak muanawm siam a ni, a ti.

James Mattis hian thla 17 defence secretary a chelh chhung hian Asia ram hi ṭum sarih a tlawh tawh a, mahse China hi a la tlawh ngai lo a ni. US defence official-te chuan Mattis-an China a tlawh a, China Defence Minister Wei Fenghe nena a inkawmna chuan rah ṭha tak a chhuah ngei an beisei thu an sawi.