Zimbabwe President rally neihnaah bomb a puak

Zimbabwe President Emmerson Mnangagwa-an rally a neihnaah bomb a puak a, mi 41 in hliam an tuar a, President chu a him hram niin health minister David Parirenyatwa chuan a sawi. Hliam tuar zingah hian President deputy pahnih an tel.

President hian Inrinni zan khan Bulawayo khuaa White City stadium-a vantlang inkhawm hi telpuiin, podium-a a lawn chhoh laiin bomb hi tihpuah a ni. Mnangagwa chuan pawikhawitute hian amah chu an beih tum ber niin a sawi a, a awmna aṭanga hla lo teah bomb hi tihpuah a nih thu a sawi.

President chuan a hmelmate chuan amah tihchhiat tumin an lo bei fo tawh tih a sawi a, a office pawh ṭum ruk zet beih a ni tawh a, office chhungah pawh vawi tam tak cyanide dah a ni, a ti. Mahse a hun a thleng lo a, a la him zel niin a sawi.