EU-in Venezuela official 11 hrek

European Union chuan May thlaa Venezuela inthlan kaihhnawihah Venezuela official 11-te hrekna a siam. EU chuan he inthlan hi zalen taka neih a nih loh bakah, a felfai tawk lo niin a sawi.

EU in a hrek zingah hian Vice President atana ruat thar Delcy Rodriquez-i bakah a thlak tak Tarek El Aissami te pawh an tel. Heng official-te hi EU ramah an zin khapsak an nih bakah an thil neihte khawih chet theih loha hreksak an ni.

May thlaa Venezuela inthlan neih hi eptu lamin an boycott a, inthlanah hian President Nicolas Maduro chu kum ruk term chelh chhunzawm tura thlan tlin a ni.

EU chuan thuchhuah siamin, inthlan kalpui a nih dan chu a rintlak tawk lo nia a ngaih thu a sawi a, official 11-te chu democracy kalphung leh dan ngai pawimawh lo leh, human rights palzutah a puh bawk.

Hetih lai hian Venezuela sorkar chuan an ram inrelbawlna leh ramchhung thila EU inrawlh chu an dem thu a sawi a, EU vauna te chu engmah an pawm loh thu a sawi. Kumin January thla khan inthlan neih tur chu kaltlang pui lo turin EU hian alo ti tawh a, official pasarih hrekna pawh alo siam tawh a ni.

Rodriquez-i hi June 14 khan vice president atan ruat a ni a, hemi hma hian National Constituent Assembly hotu a ni ṭhin. Foreign minister pawh a ni tawh a, a nuṭa Jorge Rodriguez nen hi President Maduro-a thawhpui hnai tak an ni.