Ram kang vangin California-ah emergency puang

California Governor Jerry Brown chuan Sacramento khaw hmarthlang lam, Lake County-a ram kang nasa tak vangin Thawhṭanni kahn state of emergency a puang.

Lake County-a ram kang hi 'Pawnee Fire' tih vuah a ni a, kar kalta Inrinni aṭang khan kangmei hi chhuakin ram acre 8,200-a zau a kang tawh a ni. Thli a tleh tel vangin a kangkai chak hle a, building 22 a kanchhiat tawh bakah a dang 600 vel pawh an dinhmun a him lo nia sawi a ni. Mi 3,000 vel chu hmun him lamah sawnchhuah anni tawh bawk.

Kangṭhelhtu 230 vel ten ram kang ṭhelh hna hi an thawk mek a, bulldozer pasarih leh helicopter pahnih an hmang a ni.

Governor Brown chuan ram kang hian power-te a nghawng buai a, hei vang hian kawng pawh khar a ngaih phah niin a sawi. California Department of Forestry and Fire Protection Battalion Chief Jonathan Cox chuan Pawnee Fire chu California hmarlama ram kang pali thleng mek zinga pakhat a nih thu a sawi. Hmun pathum dangah pawh ram hi a kang a, hengte hi "Stoll Fire", "Lane Fire" leh "Creek Fire" tia vuah an ni a, Tehama County leh Shahsta county-ah ram acre 4,500 chuanga zau an kangchhe tawh a ni.