Israel-in naupang tan Covid vaccine semchhuak ṭan

Israel chuan Thawh­ṭanni aṭang khan ramchhunga coronavirus hri kai pung chho mek tihziaawm beiseiin naupang kum 5-11 inkarte tan Pfizer/BioNtech Covid-19 vaccine a pechhuak ṭan.

Israel-ah hian kumin June thla aṭang khan hri leng thawh lina hi inṭanin September thla khan tlakhniam lam a pan a ni. Mahse kar hnih liamta aṭang khan hri hi a darh leh nasa a, hri inkaichhawn nasat dan, "R"/reproduction rate pawh thla hnih chhung pakhat hnuai lama awm chu a rawn sang chho leh tawh a ni.

Tunhnai chho khan nitina hri kai pawh an pung chho zel a, hri kai an hmuhchhuah zinga a tam zawkte hi naupang kum 11 leh a hnuailamte an ni.

Thawhṭanni khan Tel Aviv square-ah naupang tan Covid vaccine hi semchhuah ṭan a ni a, nimin aṭang kha ram pum huapin kalpui chhunzawm nghal a ni bawk.

Israel-a cheng mipui maktaduai 9.4 zinga chengte kum chawhrual hi an naupang hle a, an zinga mi mtd 1.2 te chu kum 5-11 inkar an ni. November thla thleng khan kum 5-11 inkar zinga hmun thuma ṭhena hmun khat chuan hri an kai tawh tih health ministry data chuan a tarlang. Scientist leh official-te chuan naupangin vaccine an lak hma loh chuan hri lakah hian an fihlim theih an rin loh thu an sawi.

Israel health ministry chhut danin naupang zinga coronavirus kai, mi 3,500 zela pakhat chuan hri an kai hnuah Multisystem Inflammatory Syndrome in Children (MIS-C) an nei zui a, an thin, chuap, kal, thluak, vun leh gastrointestinal organs-ahte natna a lang chhuak leh ṭhin a ni. Heng natna kai zinga a tam zawkte chu intensive care treatment an mamawh a, 1-2% te'n an thihpui a ni.

Healthcare provider Maccabi-in mipui ngaihdan an lakkhawm aṭanga an hmuhchhuahah, nu leh pa naupang kum 5-11 inkar nei zinga 41% chuan vaccine an lak tir tur thu sawiin, 21% chuan ngaihdan an la neih loh thu leh 38% chuan an fate vaccine an lak tir dawn lo tih an sawi.

Israel-ah hian Covid-19 kai mi maktaduai 1.3 an awm tawh a, hripui len tirh aṭang khan thihpui mi 8,000 chuang an awm tawh a ni. Israel mipui zinga 57% te chuan Covid vaccine dose bikimin an la tawh tih health ministry chuan a sawi.