Sudan sipaiten Prime Minister a dinhmun ngaiah dah let leh

Sudan sipaite chuan prime minister Abdalla Hamdok chu a thuneihna an hnehchhuh hnuah a dinhmun ngaiah an dah let leh. Politics buaina kaihhnawih avanga man zawng zawngte pawh chhuah vek an tiam.

October 25-a sipaiten sorkar paihthla a, thuneihna an hnehchhuh duh lohna lantirin mipuite chuan lungawi lohna an la lantir chhunzawm reng a, sipaite leh civil mite inkara buaina chhuak vangin civil mi 41 an thi tawh nia sawi a ni.

Sipai hotu general Adbel Fattah al-Burhan leh PM Hamdok-te chuan inthlan buatsaih hma chu sipai thuneihna hnuaiah tho Hamdok hi PM-ah leh, a kaihhruai sorkar din turin inremna an siam a ni. Hetih lai hian nawrh huaihawtte chu he inremna siam danah hian an lungawi lo hle. Sipai rorelna duh lohna lantirna kawnga political party leh pawl hrang hrang inzawmkhawm, Forces for the Declaration of Freedom and Change chuan Hamdok chu phatsantuah an puh a, nawrh huaihawt chhunzawm zel an tum tih an sawi. 

Hamdok chu PM-ah dah ni leh mah se, thuneihna tawp chu sipai kutah vek a la awm dawn avangin civil sorkar hlang a ding thei dawn lo tih an sawi a ni. Mahse Hamdok chuan buaina nasa zawk tur leh, buaina chhuak vanga thi pung zel tur venna atan he inremna hi a siampui niin a sawi thung.

Hetih lai hian United Nations chuan sipai leh PM Hamdok-ten inremna an siam chu lawmawm a tih thu sawiin, sorkar rorelna duh lohna lantir avanga mante pawh a rang thei anga chhuah turin an phut bawk.