Myanmar sipaiten medical worker 18 an man

Myanmar sipaite chuan medical worker 18, sorkarin firfiak pawla a puan member dam lote an enkawl avangin an man tih sorkar chanchinbu, Global New Light of Myanmar chuan nimin khan a sawi.

Sipaite hian Thawhṭanni khan Kayah state khawchhak lam, Loikaw khuaa Kristian biak-in pakhata damlo an enkawl laiin medical worker-te hi an man a ni.

Sipai sorkar chuan damlo te hi firfiak pawla mi niin a sawi a, mahse an pawl hming erawh a tarlang lo a, an mi mante chu dan ang taka an chungthu relsak an nih tur thu a sawi. Civil sorkar thuneihna an hnehchhuh dodalna lantirtu pawl eng emaw zat chu sipai sorkar hian firfiak pawlah a lo puang tawh a ni.

Kumin February 1-a sipaiten thuneihna an chan aṭang khan ram chhung hmun hrang hrangah sipai rorelna duh lohna lantirin nawrh huaihawt a la ni reng a, nawrh huaihawt zingah hian medical worker ṭhahnem tak an tel a ni a, sipai sorkar enkawlna hnuaia awm hospital-a thawk tam tak chuan an hna pawh an thawk zawm duh lo. Hei vang hian sipaite hian healthcare facility leh medical worker-te an bitum fo niin human rights group chuan a sawi.

Sipaiten biak-ina damlo enkawl an mante hi doctor pali, nurse pali leh nurse puitu mi 10 an ni a, a hmain hospital-ah an kal zawm duh loh avangin sipaite hian sorkar laka helah puhin thubuai pawh an lo siamsak tawh nia sawi an ni.

Civil sorkar paihthlak a nih hnua ram chhunga buaina chhuakah sipaite kutah civil mi 1,200 vel an thi tawh a, mi 10,000 chuang man an ni tawh bawk niin Assistance Assocation for Political Prisoners (AAPP) chuan a tarlang. Mahse sipai lam chuan AAPP data hi an pawm lo a, sipai sorkar thupuangtu chuan tualchhung buaina chhuakah hian sipai 200 an thi tawh niin a sawi ve thung.

NUG-in bond sale aṭangin USD mtd 6.3 hmu chhuak

Myanmar sipaiten thuneihna an hnehchhuh hnua Parliament member paihthlak tak ṭhenkhat leh democracy thlawptuten civil sorkar aiawhtu atana an din, National Unity Government (NUG) chuan bonds sale aṭangin US dollar maktaduai 6.3 an hmu chhuak tawh.

NUG chuan sipai rorelna paihthla tura an hmalakna atana sum mamawh tuakna atan bonds sale hi buatsaihin, an hralh chhuah ṭan ni Thawhṭanni khan USD mtd 6.3 hi an hmuchhuak nghal a ni. Bond hi ram pawn lama Myanmar mi awmten kum hnih chhung atan an lei hlawm a, USD 100, 500, 1,000 leh 5,000 ten an lei a ni. A leitu lam tan hian an bond lei hi hlawkpuina tur awm lo mah se, hralhchhuah ṭan aṭanga darkar thum chhung lekin USD mtd thum man an hralh hman. Bond sale aṭang hian USD tluklehdingawn khat hmuh chhuah an tum a ni.

NUG thupuangtu Dr Sasa chuan bond sale an buatsaih aṭang hian mipuiten Myanmar rama sipai rorelna rawng tak paihthlak an duh zia chiang takin a lang a ni, tiin a sawi. Sum an hmuhte an hman dan tur erawh an la puangzar lo.

Hetih lai hian sipai sorkar chuan NUG hi firfiak pawlah a lo puang tawh a ni.