Kabul Airport enkawl turin UAE-in Taliban-te inbiakna neihpui

United Arab Emirates (UAE) chuan Afghanistan khawpui, Kabul-a international airport enkawl turin Afghanistan-a rorellai, Taliban pawl chu inbiakna an neihpui.

UAE official-te chuan Afghanistan ramin ram dangte nena inkalpawhna tur air link a neih pawimawh ber, Kabul airport enkawl chungchang hi Taliban aiawhte nen ṭum eng emaw zat an sawiho tawh tih an sawi.

August thlaa Afghanistan aṭanga America leh ram dang sipaite an chhuah hnuah Taliban-te kutah Kabul-a Hamid Karzai International Airport hi a awm nghal a, Qatar chuan airport enkawl zuina kawngah a pui zui a, Taliban special force-ten airport pawn lam an veng thung a ni. Mahse airport enkawl chhunzawm zel dan turah Qatar nen hian inremna engmah an la siam hran lo nia sawi a ni.

Qatar leh UAE hian an chhehvel bialah thiltithei zawk nih tumin ṭan an la dun hle a, tun ṭuma Kabul airport chungchanga UAE hmalakna hi Qatar chuan a la chhang lo. UAE, Saudi Arabia leh an thawhpui ramte chuan Qatar ram hi firfiakte thlawpah puhin insumdawnna leh inkalpawhna lamah kum thum chhung an lo boycott tawh a, kumin January thla khan an titawp chauh a ni. Mahse an puhna hi Qatar chuan a pha thung.

US leh Taliban-ten inbiakna chhunzawm dawn

US pawhin kar leh aṭangin Qatar-ah Taliban-te chu firfiaka chetna do letna leh, Afghan mipuite harsatna tawh mek chungchangah inbiakna neihpui chhunzawm a tum tih a sawi.

America palaite hi US special representative for Afghanistan Tom West-a'n a ho dawn tih state department thupuangtu Ned Price chuan a sawi.

Taliban-ten Afghanistan-a thuneihna an chan hnu lawk, October 9-10 khan US leh Taliban aiawhte hian Qatar-ah inbiakna a lo nei tawh a ni. West chuan US chuan Taliban-te chu inbiakna a la neih pui chhunzawm zel dawn tih a sawi a, tunah erawh chuan ṭanpuina pek chungchangah Aghan mipuite chhawmdawlna tur chauh a pe rih dawn tih a sawi bawk. Taliban-ten thuneihna an chan hnuah US leh ram dang eng emaw zat chuan Afghanistan sorkar chhawmdawlna an lo pek ṭhin chu an titawp nghal a, an rama Afghanistan sorkar hminga thil neihte pawh khawih chet theih lohin an hrek sak nghal bawk.

Taliban sorkara foreign minister Amir Khan Muttaqi chuan kar liam ta khan US Congress hnenah open letter thawnin, Afghan sorkar thil neih a hrek sakte chu pe chhuak tawh turin a ngen.