Hong Kong-a independence group hruaitu hlui thla 43 tang turin hrem

Hong Kong-a independence thlawptu pawl Student Localism hruaitu hlui, kum 20 mi Tony Chung chu Thawhlehni khan national security law hnuaiah thla 43 tang tura hrem a ni.

Tony Chung hi China lak aṭanga inlakhran tumah leh dik lo taka sum hmua puhna thubuaiah hrem a ni a, bail phalsak a ni lo.

Nikum October thla khan Tony Chung hi US consulate bulaa coffee dawra a awm laiin man a ni a, a rual hian mi dang pahnih man tel an ni bawk.

A chungthu ngaihtuahnaah, district court judge Stanley Chan chuan Tony Chung hian China laka inlakhranna turin thil hrang hrang ruahmanin a huaihawt fo tih a sawi. Prosecutor-te chuan Chung-a pawl, Student Localism hian social media lamah Hong Kong-a rorelna hran din leh, China rorelna paihthlak duhna lam thu 1,000 chuang zet an tichhuak tawh tih an sawi bawk a ni.

Chung hi Hong Kong-a national security law hman a nih hnuah he dan hmanga thiam loh chantir tawh zinga naupang ber a ni. He dan hmang hian China lak aṭanga inlakhran tum, firfiak zawnga che leh ram dangte nena inthurual nia puh mi 150 chuang man ni tawhin, an zinga a zahve vel chu thubuai siamsak an ni tawh bawk.