Europe-ah Covid vangin mi nuai 7 an thih belh a rinawm -WHO

World Health Organisation (WHO) chuan Covid hri leng a hluar chhoh leh avangin nakkum March thlaah chuan Europe leh Asia hmun ṭhenkhatah he hri vanga thi hi mi nuai sarih vel an awm belh leh a hlauhthawnawm tih a sawi.

WHO-in Europe region huam chhunga a puan, ram 53-ah Covid-19 vanga thi hi mi maktaduai 1.5 an tling tawh a ni.

Tun hnaiah Europe-ah hian hri leng a hluar thar leh hle a, Austria ram chuan hri kai an pun zel avangin ram pum huapin complete lockdown a puang tawh a, ram dangte pawhin hri darh tur venna atan khuahkhirhna tharte an siam leh tawh bawk.

France, Germany, Greece leh ram dang ṭhenkhat chuan Covid vaccine dose kima la tawhte pawh booster dose pek leh an tum mek.

Hetih lai hian ram ṭhenkhatah chuan sorkarin khuahkhirhna a siamte duh loin nawrh an huaihawt a, Netherlands ramah chuan partial lockdown puan avanga lungawi lo mi tam takin lungawi lohna lantirin buainate a chhuak a ni.

WHO chuan zirchianna an neihah Europe region-ah Covid vanga thi hi an pung chak hle tih sawiin, he hri kaihhnawiha thi hi tun hnaiah a leta pungin, ni khatah thi zat hi 4,000 chuangte an awm a ni, a ti. Russia ram bikah pawh ni khatah hri vanga thi hi mi1,200 te an awm tling.

Europe region hri darh chak lehna chhan pakhat chu vaccine la duh lo an tam vang te, inkaichhawn awlsam tak Delta variant a darh vangte niin WHO chuan a sawi. WHO Europe director Dr Hans Kluge chuan Covid vaccine la lote chu la ngei turin a ngen nawn leh. "Kan vaiin vaccine la turin hun ṭha kan nei vek a, chhiatna rapthlak zawk thleng tur leh nunna tam zawk chan tur veng thei turin mawhphurhna kan nei vek a ni," a ti.

Netherlands-in Covid hri kai Germany-ah thawn

Netherlands ram chuan an rama Covid-19 hri kai an pun zel avanga hospital hrang hrang indaih lohna thleng mek avangin, Thawhlehni aṭang khan hri kai ṭhenkhat chu enkawl turin Germany ramah a thawn.

Health lam thuneitute chuan Thawhlehni zing khan hri kai enkawl ngai pakhat chu Rotterdam aṭangin ambulance-in km 240 vela hla, Bochum-a hospital-ah thawn a ni a, hemi ni tlai lamah hian dam lo dang pawh thawn leh an ni tih an sawi.

Dutch damdawi-in hrang hrangah May thla hnua Covid-19 hri kai enkawl ngai an pun chak leh avangin damdawi-in lam pawh an indaih loh chho tawh hle a, hri leng hi a la zual zel dawn nia sawi a ni bawk.

Hri kai ngaihtuahawm, intensive care unit-a enkawl ngai pawh an pung zel a, Dutch health authority (NZA) chuan ram chhunga operating theatre hmun thuma ṭhena hmun khat chu intensive cared bed dahna turin khar an ni tawh tih an sawi.

Hetih lai hian hri darh zel tura venna atana Netherlands sorkarin khuahkhirhna a siamte chu duh loin kar liam ta Zirtawpni aṭang khan mi tam takin lungawi lohna an lantir a, khawpui hrang hranga nawrh huaihawt zinga mi 170 vel chu man an ni tawh.