Joe Biden-a'n virtual summit-ah ram 110 a sawm; China leh Russia sawm an ni ve lo

US President Joe Biden chuan December 9-10 a virtual summit for democracy neih turah ram 110 a sawm a, mahse sawm zingah hian China leh Russia erawh an tel ve lo thung.

State department chuan virtual summit-a tel tura sawmte list hi a tichhuak a ni. India, Pakistan leh Iraq-te sawm an nih laiin, Afghanistan, Bangladesh leh Sri Lanka-te erawh sawm an ni lo. NATO hnuaia US thawhpui, Turkey ram pawh sawm a ni lo bawk.

President Biden chuan Taiwan ram a sawm tel a, hei hian China a tih lungawi loh hle rin a ni. China chuan Taiwan hi a ram chinah a chhal a, ram dangte inrawlh pawh a ngaithei lo hle. Tun thla tir lama Biden leh China president Xi Jinping-ten virtual meeting an neihah pawh Taiwan chungchangah hian an ngaihdan a in ang lo hle a ni. Hei vang hian US-in summit-a tel tura China sawm lo a, Taiwan a sawm bawk si avangin US leh China inkar boruak pawh chhiat zual phah rin a ni.