Israel-in Syria a beihnaah civil mi 2 an thi

Israel sipaiten thlawhtheihna hmangin nimin khan Syria central region-a Homs khawpui a bei a, civil mi pahnih an thih bakah mi dang pasarihin hliam an tuar niin Syria chuan a sawi.

Syria sorkar news agency, SANA chuan Israel hian indo thlawhtheihna hmangin nimina an ram huna zing lam dar 1.26-ah Lebanon airspace aṭangin missile a kap chhuak niin a sawi a, hliam tuar zingah hian sipai paruk an tel tih a sawi bawk.

Israel hian Syria hi ṭum tam tak a lo bei tawh a, kar liam ta pawh khan Damascus khawchhak lam chu surface-to-surface missile-in a kap a ni. He missile hi Israel-in a luahsak, Goland Heights aṭanga kahchhuah nia sawi a ni. Mahse hemi ṭum hian thil tihchhiat lian tham leh hliam tuar an awm lo nia sawi a nih bakah, a missile kahchhuah zinga pakhat chu an lo kah thlak sak hman niin an sawi.

Syria-in an ram bei nia a puh ṭhin chungchang hi Israel Defence Force lam chuan an chhang zui ngai lo a, nimina Homs khawpui a bei nia an puhna pawh engmah an sawizui lo.