Germany Chancellor thar tur Olaf Scholz

Germany-a party pathum-Social Democrat Party (SDP) , Greens leh Free Democrats (FDP)-te chuan inremna siamin, Social Democrat hruaitu Olaf Scholz kaihhruai ṭangrual sorkar a ding thei dawn ta.

Kum 16 chhung zet Chancellor Angela Merkel kaihhruai conservative sorkar chu thlakin, Olaf Scholz chu Germany Chancellor thar a ni dawn ta a ni. Party pathumte hian Parliament lower house-ah majority an nei thei dawn a, an thawhhona tura inremna an siam, phek 177-a chhah hi an tihfel hunah December thla tir lamah ṭangrual sorkar thar hi lakluh hman beisei a ni.

Kum 63 mi, Scholz hi Merkel kaihhruai ṭangrual sorkarah finance minister a ni. Berlin-a news conference an neihah, Scholz chuan sorkar thar chuan an rama Covid-19 hri leng mek doletna tur chu a ngaih pawimawh hmasak tur thu a sawi. Hei bakah an thawhpui tur party-te nena inremna an siamah hian minimum wage tihsanna tur te, lungalhthei hman tihtawpna turte pawh an telh tih a sawi. Mulitple citizenship neih te, vote thlak thei chin kum 16 china bithliah te, Europe ram zingah Germany chu dan anga cannabis hralh phalna ram hmasa bera siamte pawh an remti a ni.

Scholz chuan ṭangrual sorkar tharah chanvo pawimawhte mipa leh hmeichhiate hnena rualkhai taka sem a duh thu sawiin, Greens party hruaitu Annalena Baerbock (40) chu foreign minister-ah dah a rin a ni a, dah a nih chuan German hmeichhe zingah foreign minister ni thei hmasa ber a ni ang. FDP hruiatu Christian Lindner (42) chu finance minister a ni dawn nia sawi a ni bawk.

September 26-a inthlanpui an neihah khan Social Democrats hi party mala seat la hnem ber a ni a, Angela Merkel-i kaihhruai Christian Democrat ṭangrual pawlin an pha lo a ni. SDP hian Parliament lower house, Bundestag-a seat 735 awmah seat 206 a la a, Merkel-i pawlte hian seat 196 an la. Greens pawh hi inthlan an chuh tawha an chet ṭhat ber ṭum niin seat 118 an la a, Free Democrats hian seat 92 an la bawk a ni.