Libya Election Commission-in President candidate aṭangin Gaddafi fapa hnawl

Libya Election Commission chuan December thlaa an ram President thlanna neih tura chuh tum, Libya ram hruaitu hlui Muammar Gaddafi fapa Saif al-Islam Gaddafi chu candidate aṭangin a hnawl.

President thlanna neih turah hian chuh tuma hming pe lut 98 awmin, an zinga 25 chu Commisison hian a hnawl a, hnawl zingah Gaddafi hi a tel a ni.

Commission chuan Gaddafi hi pawikhawihna thubuai siamsakah thiam loh chantir a nih tawh avangin inthlan hi a chuh ve thei lo niin a sawi. Kum 2011-a a pa, Muammar Gaddafi paihthlak tuma nawrh huaihawttute lakah pawikhawihna thlenah a fapa hi puhin thubuai siamsak a ni a, kum 2015 khan Tripoli court chuan he thubuaiah hian thi turin a chungthu a lo relsak tawh a ni.

Candidate hnawl zingah hian premier hlui Ali Zeidan leh Palriament member hlui Nouri Abushamain-te pawh an tel. Hetih lai hian President candidate atana pawm zingah eng emaw zat chu an khingpuiten dan bawhchhiaa an puhte an ni bawk.